維拉斟韋費特沙夏　艾美利未圓心願

阿士東維拉喺艾美利帶領下，近2季成績突飛猛進，據報維拉計劃再簽猛將，目標直指加拉塔沙雷翼鋒韋費特沙夏。艾美利5年前仲教緊阿仙奴嗰陣，曾公開表明好欣賞呢位科特迪瓦球星，可惜收購未有實現，依家終於有機會實現心願。

維拉雖然已有奧尼屈堅斯、穆沙戴亞比同里安拜尼3大攻擊手，不過仍希望再引入多1名攻擊球員。據《Football Transfers》網站報道，佢哋睇中31歲嘅韋費特沙夏，呢位翼鋒上年先結束水晶宮8年生涯改投加拉塔沙雷，但重返英超嘅吸引力仍然好大，而且維拉亦有份踢歐洲賽，難怪韋費特沙夏心郁。

據報今次交易係艾美利主張，佢喺2019年執教阿仙奴，已曾要求球會簽韋費特沙夏，但結果阿仙奴簽入另一翼鋒尼高拉斯比比，當時艾美利話：「沙夏可以用一己之力贏波，包括贏熱刺、曼城同我哋(阿仙奴)，每次對親沙夏都會好頭痛，佢就係我希望得到嘅球員。」