阿仙奴上訴成功　馬加希斯入波+1

阿仙奴上仗英超以5比0大勝水晶宮，原本兵工廠第2個入波，被判為水晶宮門將甸恩軒達臣擺烏龍，但阿仙奴提出上訴，賽會最終宣布，呢個入波屬於中堅加比爾馬加希斯射入，意味呢位26歲巴西國腳該仗梅開二度，今季英超已累積3個入波。

開賽11分鐘，加比爾馬加希斯頂入角球，戰至37分鐘，阿仙奴又發動角球攻勢，加比爾馬加希斯再次衝頂，皮球省中門將甸恩軒達臣入網，賽會初時判加比爾馬加希斯入波，但後來改為甸恩軒達臣擺烏龍。

賽後阿仙奴方面決定提出上訴，為加比爾馬加希斯討回公道，英超賽會最新宣布，兵工廠上訴得直，將入球歸入馬加希斯名下。

加比爾馬加希斯上月英超對利物浦，開賽4分鐘就入波，加上上仗梅開二度，今季聯賽已有3球進帳，佢職業生涯單季聯賽最多入波紀錄係2021/22年攻入5球，呢位中堅近期腳風極順，今季有機會刷新紀錄。