拿玻里確認奧森漢今夏離隊　倫敦雙雄搶人

拿玻里射手域陀奧森漢喺意甲日子進入倒數，班主迪羅倫迪斯承認呢位25歲尼日利亞國腳將於今夏離隊，盛傳英超雙雄阿仙奴、車路士最大機會簽入域陀奧森漢。

雖然域陀奧森漢剛於上月續約至2026年，但新約毀約金只係1.12億鎊(約11億港元)，反映只要有球會願意出價，拿玻里就唔會阻止佢走人，班主迪羅倫迪斯最近接受傳媒訪問時話：「我哋上年夏天已經知道域陀奧森漢想離隊，所以續約過程花費唔少時間，但雙方關係良好，我哋知道佢可能轉投皇馬、巴黎聖日耳門，或者英超頂級球隊。」域陀奧森漢早前亦透露今季結束後，將決定前途問題。

域陀奧森漢上季意甲上陣32場入26球，成為聯賽神射手，並協助拿玻里相隔33年再次嘗到意甲冠軍滋味，當時已傳出多間大球會想收購域陀奧森漢，但由於拿玻里諸多要求，導致未能成事。

近期傳得最多係阿仙奴、車路士同時睇中域陀奧森漢，特別係車仔欠缺1位可靠射手，以佢哋近年揮金如土嘅增兵政策，相信有力買斷域陀奧森漢。