馬體會門將降臨英超　幫錫菲聯救亡

馬德里體育會及錫菲聯官宣，後備門將伊禾加碧由馬體會轉投錫菲聯，簽約3年半，據報轉會費250萬歐元(約2,125萬港元)，伊禾加碧將協助英超榜末嘅錫菲聯護級。

28歲嘅伊禾加碧比賽生涯都幾好腳頭，佢係克羅地亞國腳，前年世盃季軍成員，不過從未上陣，佢加盟馬體會4年擔任奧比歷副手，但就喺20至21年捧過西甲冠軍，之後21至22年球季外借到里爾。

錫菲聯領隊韋達對伊禾加碧來投充滿期待，佢話：「我哋簽入一位好門將，我已經了解過伊禾加碧嘅情況，我相信佢可以成為球隊重要一員，期待同佢合作。」錫菲聯暫時21戰只得10分，共失51球屬英超失球最多球隊，希望伊禾加碧加盟後可以止到血。