阿根廷3月訪華踢兩場　其中一仗可能鬥國足

阿根廷國家隊將再次訪華，該國足總宣布，呢支2022年世界盃冠軍將於3月飛赴中國，踢兩場熱身賽，根據阿根廷傳媒爆料，其中一場可能對中國隊，但以國足喺今屆亞洲盃嘅低迷表現，面對球星如雲嘅阿根廷，勢必面臨重大考驗。

阿根廷捧完上屆世界盃冠軍之後，曾於上年6月訪華，喺北京踢1場熱身賽，憑美斯、比薛拿各入1球，以2比0擊敗澳洲。雖然當時阿根廷對手並非國足，但仍然掀起搶購門票熱潮，難怪食過番尋味，僅相隔9個月將再次訪華，並加碼踢2場。

據悉阿根廷將於3月18日喺杭州對中國隊，3月26日喺北京對加納，但最終對手，以及美斯會否隨隊，仍然有待落實。

國足喺今屆亞洲盃分組賽3戰不勝，兼冇波入出局，一旦要同世界勁旅阿根廷交鋒，希望球員們加多幾錢肉緊，以免出現大敗賽果。