雲迪積克考慮離隊　利物浦骨幹面臨瓦解

利物浦領隊高普宣布季尾離任後，「紅軍」長遠前景即時出現問號，有關球員去留同轉會策略亦要重新部署，荷蘭中堅華基爾雲迪積克(VVD)率先表示，會觀察利物浦對未來發展嘅決定，暗示會考慮跟隨高普一齊離開，而多位主將亦面臨類似抉擇。

VVD同利物浦合約只剩18個月，被問到會唔會係「紅軍新時代」嘅一員，呢位荷蘭國腳就話：「呢個係好難答嘅問題，我唔知道。利物浦依家有好重要嘅任務，唔單止換領隊，仲要換成個教練團，好多嘢都會變。我好好奇球會嘅方向係點，喺有定案之後我會再睇自己嘅情況，依家冇乜好講。」

英國《太陽報》消息指，多位利物浦老臣都可能會跟高普一齊走，包括獲沙特球會垂青嘅穆罕默德沙拿同艾利臣比加，而祖高美斯同祖爾麥迪比亦會考慮前途問題。利物浦今季已全力年輕化，多位新星成功上位，高普離開或促使「紅軍」全面洗牌。