發生咩事？尼馬現身忽然「脹爆」

巴西球星尼馬上年8月加盟沙特豪門希拉爾，點知10月份就因膝部韌帶撕裂長抖，日前佢出席巴西傳奇羅馬里奧嘅生日派對，忽然「脹爆」嘅身形即成網民熱話，唔少球迷認為尼馬已放棄足球事業，將會同「大哨」朗拿度一樣走上肥仔之路。

31歲嘅尼馬只係養傷3個月，周一(29日)出席羅馬里奧58歲生日派對，現身嗰陣竟然脹咗幾個碼，震撼畫面即時成為網上熱話，大批網民留言：「羅馬里奧仲弗過佢」、「尼馬真正踏上朗拿度之路」、「張相係咪畀人P過」、「尼馬已經放棄足球事業」......

尼馬同希拉爾嘅合約去到2025年夏天，但目前因外援名額問題被暫時撤銷註冊。據巴西國家隊隊醫透露，尼馬目標係喺今年8月復出，但就肯定錯過6月上演嘅美洲國家盃。