軒達臣阿積士首演　修夫基入場觀戰

英格蘭球星佐敦軒達臣上月由沙特回流歐洲，周日(4日)凌晨荷甲首度為阿積士上陣，並協助球隊主場1比1打和榜首嘅燕豪芬。英格蘭領隊修夫基今仗專程入場睇波，踢足全場嘅軒達臣表現唔錯，相信唔會令修夫基失望。

阿積士今場19分鐘由貝侯斯先開紀錄，但燕豪芬34分鐘由盧克迪莊追平，33歲嘅軒達臣表現活躍，早段一次精彩長為隊友製造機會，貝侯斯嘅入波佢亦有份參與。軒達臣賽後表示：「今場對我同屋企人都非常特別，第1次為阿積士上陣肯定難忘，燕豪芬係好強嘅對手，佢哋全季都未輸過，但我哋一樣有機會贏波，可惜未能把握。」

對於修夫基入場觀戰，軒達臣就話全不知情：「我唔知修夫基喺度，你(記者)依家講我先知道，或者佢唔想畀我壓力，知道修夫基入場我梗係開心，佢揀咗一場好緊湊同好高質素嘅比賽睇。」軒達臣上月同伊蒂法克解約重返歐洲，其中一個目標就係出戰夏天嘅歐國盃決賽周。