國際米蘭今年6戰全勝　勢重演奪冠好戲

周一(5日)凌晨意甲榜首大戰，「一哥」國際米蘭主場以1比0擊敗祖雲達斯，踏入2024年之後踢6場比賽全勝，亦係球隊史上第3次開年6連勝，對上一次係2007年，最終奪得意甲冠軍，今季有望歷史重演。

雙方今仗爭勝決心都十分強，國際米蘭稍佔上風，全場有15次射門，比祖記多3次，但係兩隊命中率都非常低，國米僅3次射門中目標，祖記更加只有1次。戰至37分鐘，國際米蘭中場尼高路巴列拿右路傳中，祖記中堅加迪情急之下擺烏龍。國米下半場仲有1次黃金機會可以拉開紀錄，可惜查漢奴古勁射中柱彈出，但無阻球隊全取3分。

國際米蘭贏波之後，領先第2位祖雲達斯4分，兼踢少1場，向冠軍邁進一大步，至於祖雲達斯各項賽事連續19場不敗走勢斷纜。

另外，國際米蘭前鋒拿達路馬天尼斯透露，仍然努力同會方傾續約問題，希望達成協議，呢位26歲阿根廷國腳仲有2年合約在身，早前傳出佢唔想續約，逼國米今夏出售佢。