馬天尼斯受重創　坦哈格：情況好壞！

曼聯周日(4日)英超3比0大破韋斯咸，傷兵回歸後即踢出3連勝，可惜今仗又再添傷患，復出冇耐嘅利辛度馬天尼斯下半場傷出，懷疑傷及膝部韌帶，領隊坦哈格形容佢情況「好壞」，似乎已就診斷結果做最壞打算。

利辛度馬天尼斯上年9月蹠骨受傷，抖咗差唔多4個月，今仗係佢復出後第4仗，下半場同華迪美高法爾一次爭波，右膝疑被壓傷，最後痛苦被扶離場。坦哈格賽後表示：「我唔知詳情，但睇落情況好壞，要等未來幾日作出正確診斷，呢一刻我哋好悲傷，只可以祈禱情況唔係咁差。」

曼聯中堅人手足夠，哈利馬古尼、華拉尼、莊尼伊雲斯同域陀連迪路夫都可以候命，不過當中冇人具備利辛度馬天尼斯嘅後場組織能力，如果呢位阿根廷國腳真係長抖，對曼聯爭奪歐聯資格會係極大打擊。