同阿根廷作對？加拿祖又扮C朗慶祝

曼聯上仗英超大勝韋斯咸3比0，阿歷真度加拿祖梅開二度，表現非常搶鏡，但佢入波之後坐上廣告牌，扮C朗慶祝姿勢，可能會再次引起阿根廷國家隊隊友不滿，將來為國出征，隨時會被孤立。

眾所周知，阿歷真度加拿祖一向視C朗為偶像，入波之後往往會做出呢位葡萄牙巨星慶祝動作，包括跳起空中轉身「Siu」，同埋雙手放心口，今次輪到扮C朗坐上廣告牌。阿根廷名將迪馬利亞早前公開告誡加拿祖唔好再扮C朗：「如果我係加拿祖，就唔會模仿C朗。」相信係由於C朗同阿根廷球王美斯係宿敵，迪馬利亞認為加拿祖作為阿根廷新晉國腳，冇理由撐對手。不過，阿歷真度加拿祖一於懶理，當迪馬利亞冇到。

亦有報道指，加拿祖坐廣告牌嘅動作，係回敬韋斯咸中場古達斯，因為上次韋斯咸贏曼聯2比0，古達斯入波後走去場邊坐廣告牌。至於加拿祖係扮C朗定寸古達斯，可能兩樣都有啦。