內部提升！曼城扑槌夏天簽沙維奧

曼城王朝如日方中，背後嘅城市足球集團(City Football Group)勢力龐大，據轉會權威Romano報道，曼城已扑槌收購同屬CFG嘅基羅納翼鋒沙維奧，呢位閃耀西甲嘅19歲翼鋒會喺夏天加盟，令「藍月亮」如虎添翼。

基羅納今季喺西甲爆發，交出5個入波同7次助攻嘅沙維奧係核心人物，而且獲巴塞隆拿、多蒙特、利物浦等豪門垂青，不過曼城就先下手為強成功搶人，Romano報道：「曼城同意夏天簽入沙維奧，未來幾日會正式簽署文件，雖然有德甲、英超球會開價，但沙維奧會去曼城，佢依家會100%專注為基羅納完成今季西甲。」

事實上，沙維奧其實係屬於法乙球會特魯瓦，佢今季只係以借用性質加盟基羅納，不過特魯瓦亦都係CFG旗下球會之一，既然幾隊都係「自己友」，曼城要「內部提升」自然冇難度。沙維奧上年12月受訪，亦預示過為曼城效力嘅決心：「由加盟基羅納第1日，我嘅目標就係去曼城，如果有一日夢想成真，代表我喺基羅納踢得好好。」