離開曼聯更好？雲迪碧克德甲生涯跌谷底

曼聯近年被批評「糟蹋」唔少球星，荷蘭中場雲迪碧克4年前由阿積士加盟後，由天子驕子變成大後備，上月外借德甲法蘭克福諗住重新做人，點知一樣愈踢愈頹，最近就連歐協聯25人名單都冇份註冊，生涯跌落谷底。

雲迪碧克轉會法蘭克福後被寄以厚望，一去到就即刻做正選，不過踢落就唔太對路，第3場聯賽喺半場期間就被換走，上仗作客科隆更加坐足全場冷板，極速失去教練托比慕拿嘅信任。

英國《每日鏡報》報道，法蘭克福提交歐協聯最新名單，由於每隊季中只可以更換3個球員，法蘭克福就選擇幫另外3名新兵沙沙卡拉積錫、伊基迪基同菲臘麥斯註冊，雲迪碧克夏天幾乎肯定可以另謀高就。