利華古遜絕殺史特加　為鬥拜仁壯聲勢

周三(7日)凌晨德國盃8強大戰，利華古遜踢到90分鐘憑中堅莊拿芬泰希入波，主場以3比2反勝史特加，晉身4強，向雙冠王目標又行近一步，並為周日(11日)凌晨德甲榜首大戰，主場鬥拜仁慕尼黑，增強爭勝信心。

德甲一哥利華古遜遇上第3位嘅史特加，陷入苦戰，開賽11分鐘就失守，被史特加後衞華迪馬安頓頂入角球，打開紀錄。利華古遜要等到下半場初段，先至靠中場安特列治遠射入世界波扳平，但轉個頭因為防線犯錯，被史特加中場基斯富列治射成2比1。

利華古遜再度落後之下，20歲中場新星科利安華迪斯扮演救世主，作出2次美妙助攻，分別由阿特利、莊拿芬泰希各建一功，戲劇性反敗為勝，打入4強。

利華古遜史上僅曾於1993年捧過1次德國盃冠軍，球隊今季表現大勇，加上主要勁敵拜仁慕尼黑、多蒙特、BR萊比錫已經出局，好大機會一嘗冠軍滋味。