老細拍板　國際米蘭有望訪港

繼國際邁亞密之後，另一支「國際球隊」國際米蘭亦計劃訪港，球會班主張康陽喺社交網話，應中國香港體育協會暨奧林匹克委員會副會長邀請，國米將會安排中國之行，並期待到香港踢表演賽。

港協副會長早前去意大利進行文化考察，並獲國際米蘭方面邀請入場睇波，佢亦邀請對方訪港交流，呢支意甲勁旅喺社交網上回應：「感謝社會各界及廣大球迷熱情關注，十分榮幸獲港協副會長來到國米交流訪問，同時感謝佢嘅邀請，球隊好期待將來有機會訪港，進一步交流足球文化。」

隨後國際米蘭班主張康陽喺社交網分享呢則貼文話：「國米中國行！安排！」加上OK手勢符號，似乎已經拍板，但未有透露幾時訪港。

國際米蘭係上屆歐聯亞軍，陣中擁有拿達路馬天尼斯、查漢奴古、米希達利恩等球星，如果真係訪港，必定轟動。