麥巴比入波30+　PSG晉身法足盃8強

周四(8日)凌晨法足盃16強，巴黎聖日耳門(PSG)主場以3比1擊敗比斯特，晉級8強，球星基利安麥巴比射入1球，今季各項球會賽事已累積30球進帳，成為今季歐洲5大聯賽首位入波「30+」球員。

比斯特今季異軍突起，排法甲第3位，並曾於上月聯賽作客逼和榜首PSG，所以PSG今仗不敢怠慢，壓住對手來攻，上半場34分鐘，基利安麥巴比喺禁區右路窄角度勁射入網，僅過3分鐘，丹尼路彭利拿近門射成2比0，其後基利安麥巴比笠射，可惜中楣彈出。

換邊之後，比斯特由前鋒穆尼爾頂入追至1比2，一度重燃希望，但中堅尼利安巴斯亞被逐，導致球隊無力翻身。戰至補時，干卡路拉莫斯為PSG射成3比1完場。

基利安麥巴比今季為PSG上陣29場入30球，屬於今季歐洲5大聯賽最多入波嘅球員，比第2位拜仁慕尼黑前鋒哈利卡尼多2球。另外，呢位法國國腳職業生涯喺法足盃累積上陣28場創造50球，包括射入35球及15次助攻。