夏蘭特幾時續約？佢等緊一個人去向

曼城一直計劃同前鋒艾寧夏蘭特續約，根據西班牙《阿斯報》爆料，呢位23歲挪威國腳之所以仲未答應，因為等緊巴黎聖日耳門(PSG)射手基利安麥巴比去向，如果對方今夏加盟皇馬，佢先至會選擇同「藍月亮」續約。

《阿斯報》指艾寧夏蘭特同基利安麥巴比都係皇馬嘅收購目標，2人亦有興趣上「艦」，但係皇馬近年財政欠佳，難以同時簽入呢2位球星及負擔其巨額薪酬，預料只能二選一。

由於基利安麥巴比將於今夏約滿，好可能離開巴黎聖日耳門，比較大機會加盟皇馬，所以艾寧夏蘭特只能靜觀其變，一旦麥巴比上「艦」，意味自己轉投皇馬機會大減，到時再續約都未遲。

艾寧夏蘭特仲有3年合約在身，根據合約條款，佢有權要求今夏轉會，其他球會只要出2億歐元(約17億港元)就可以買斷佢。曼城希望同夏蘭特續約之後，可以廢除解約條款。