「老人世盃」面世　5大金球獎得主參賽爭冠

今個夏天盛市連連，除咗奧運、歐國盃同美洲國家盃之外，據報第1屆「老人」世界盃亦會喺英國舉行，參賽球隊為曾經贏過世界盃冠軍嘅8支國家隊，而參賽球員都要係35歲或以上，報道指朗拿甸奴、卡卡、簡拿華路、奧雲同李華度5位贏過金球獎嘅傳奇，都喺參賽名單上。

據英國《每日郵報》報道，賽事由精英運動員集團(EPG)舉辦，6月份會喺英格蘭上演，球場仍有待落實，參賽8隊為拎過世界冠軍嘅英格蘭、巴西、阿根廷、德國、法國、西班牙、烏拉圭同意大利參賽，8隊嘅隊長麥馬拿文、艾馬遜、甘比亞素、古蘭爾、卡林保、沙加度、盧根奴同馬特拉斯，正正就係EPG嘅創會成員之一。

報道指目前定落嘅參賽名單，仲有朗拿甸奴、卡卡、簡拿華路、奧雲同李華度5位贏過金球獎嘅名將，里奧費迪南、林柏特、卡路士、亨利、奧斯爾、佩奧爾、科蘭同基斯普等，據報都有望參賽。呢個「老人」世界盃為期1星期，但每場只會踢70分鐘，決定會喺6月11日上演。