傳林柏特回歸車路士　今次教女足？

車路士領隊普捷天奴近期被傳帥位不穩，摩連奴、迪薩比、沙維等都傳聞係候選接任人，最近更有消息指「藍戰士」傳奇林柏特將會回歸，不過佢就唔會係普捷天奴代替者，而係執教車路士女足！

車路士女足殿堂級主帥希耶絲，5月份就會擔任美國女足主帥，結束12年嘅車路士女足執教生涯。據英國傳媒報道，車路士物色新帥其中一個目標，就係球會傳奇林柏特，「林伯」雖然冇執教女足經驗，但佢對車路士上下瞭若指掌，被視為合適人選。

林柏特執教愛華頓嗰陣，曾經同佢共事嘅前英格蘭女足國腳基絲甸臣表示：「林柏特對車路士好熟悉，根據我同佢嘅接觸，林柏特嘅性格同溝通能力好適合執教車路士女足，唔應該根據性別去揀人，男人一樣可以教女足。」林柏特嘅前英格蘭隊友菲臘尼維利，就曾經執教英格蘭女足。