「帶刀侍衞」入波平紀錄　AC米蘭力挫拿玻里

周一(12日)凌晨意甲重頭戲，AC米蘭主場以1比0擊敗上季冠軍拿玻里，左後衞迪奧靴南迪斯射入全場唯一入球，呢位26歲法國國腳今季聯賽4個入波都喺主場射入，同德甲一哥利華古遜右閘謝利美費林邦並列今季歐洲5大聯賽主場最多入波嘅後衞。

開波初段，拿玻里獲得黃金機會，前鋒基奧雲尼施蒙尼近門起腳，但擦柱出界，戰至25分鐘，拉菲爾利亞奧邊線妙傳，迪奧靴南迪斯後上殺入禁區窄角度射入打開紀錄。A米之後創造唔少入波機會，包括拉菲爾利亞奧遠射，僅被門將高連尼飛身撲出。

拿玻里亦有基奧雲尼施蒙尼、保列坦奴射門唔中目標，比賽後段，拉菲爾利亞奧連番失機，其中一次「單刀橫傳」被對手解圍，幸好無阻A米全取3分。

AC米蘭近9場聯賽取得7勝2和，但仍然落後榜首國際米蘭8分，兼踢多對方1場。至於拿玻里已經跌至第9位，表現同上季有天壤之別。