挪威神鋒內訌　艾爾尤諾斯6年前射破曼城

哥本哈根同曼城將於周三(14日)凌晨歐聯16強首回合交鋒，賽事其中一個焦點必定係雙方2位挪威射手艾爾尤諾斯、艾寧夏蘭特正面交鋒，論人氣及射術，無疑係夏蘭特佔優，但艾爾尤諾斯亦唔嘢小，曾於6年前歐聯16強，為巴素利射入曼城大門，今仗要力爭重演好戲。

現年29歲嘅艾爾尤諾斯同曼城好有緣，效力瑞士球隊巴素利期間，曾於2017/18年球季歐聯16強遇上「藍月亮」，佢喺次回合入波，協助球隊贏2比1，但係巴素利兩回合合計仍然大敗2比5。其後艾爾尤諾斯轉投修咸頓，亦有多次機會同曼城交鋒，累積唔少經驗，今仗可以大派用場，為隊友提供情報。

艾爾尤諾斯上年夏天被修咸頓放棄，以自由身加盟哥本哈根之後，大踢爭氣波，今屆歐聯有2球進帳，包括主場射入曼聯大門，成為贏波功臣，今場隨時再扮演「英超剋星」，攻破曼城防線。