莫拉達重傷　或無緣鬥國米

馬德里體育會喺周一(12日)凌晨西甲作客0比1不敵西維爾之餘，射手艾華路莫拉達更加勇戰受傷，而且傷勢唔樂觀，恐怕會缺陣下周三(21日)凌晨歐聯16強首回合作客國際米蘭。

臨完上半場前，艾華路莫拉達同對手相撞之後，雙手抱緊右膝，表情非常痛苦，離場時不禁落淚，可見傷勢嚴重。西班牙《馬卡報》指呢位31歲前鋒嘅右膝內側韌帶受傷，將會接受進一步檢查，先至知道要休息幾耐，初步排除韌帶撕裂。

艾華路莫拉達今季為馬體會各項賽事上陣30場入19球，屬於球隊主力射手，如果佢無法上陣對國際米蘭，球隊晉級機會肯定大受削弱。