【賽後解碼】車仔土炮崛起　英軍孖寶成新靈魂

車路士近20年屬於「聯合國球隊」，因為前任班主阿布拉莫域及現時老闆保利都不惜重金收購外援，本土球員難上位，但今季情況有變，2位新一代英格蘭國腳干拿加歷查、高爾彭馬演出光芒四射，撐起車路士，今仗可以擊敗水晶宮，2人有好大功勞。

保利2年前入主車路士，大肆增兵，包括以過億鎊簽入2位中場安素費南迪斯、摩西斯卡些度，但論表現，反而係上年夏天由曼城上「車」嘅高爾彭馬最出色，呢位21歲新星今仗對水晶宮，補時貢獻2次助攻，今季英超已經創造16個入球，包括射入10球及6次助攻，屬於隊內之冠，而且佢轉會費僅4,000萬鎊(約4億港元)，可以話係車仔近年性價比最高嘅收購。

至於干拿加歷查更加係車仔青訓產品，近年曾經被外借去查爾頓、史雲斯、西布朗、水晶宮，上季重返母會後，開始獲得重用，加上踢法全面，被譽為「新林柏特」。高爾彭馬今仗有2次助攻，干拿加歷查則梅開二度，標誌球隊土炮勢力崛起，英格蘭國家隊亦成為受益者。