美斯拍超級碗廣告袋7800萬　唔介意失中國市場

國際邁亞密球星美斯訪港「齋坐」事件，導致阿根廷下月到中國踢2場熱身賽計劃取消，呢位36歲球王亦失去到中國掘金機會。不過，無損美斯喺其他地方吸金，國內傳媒指佢近期為美國超級碗拍攝啤酒廣告，獲得1,000萬美元(約7,800萬港元)酬金，難怪唔介意冇咗中國市場。

美斯呢條啤酒廣告片長1分30秒，佢喺沙灘表演秀麗腳法，最後起腳勁射，然後同朋友嘆杯啤酒。雖然橋段冇乜創意，但價值不菲，據悉美斯從廣告出鏡費、拍攝費，以及喺自己社交網分享廣告片段等「工作」，總共獲得1,000萬美元酬金，輕鬆又賺一大筆。

美國運動商業市場龐大，難怪美斯上年拒絕沙特阿伯拉豪門希拉爾開出嘅天價年薪，都要加盟美職球隊國際邁亞密。