久保建英續約至2029　曼聯死心吧

西甲球隊皇家蘇斯達出戰周四(15日)凌晨歐聯16強首回合作客巴黎聖日耳門之前，公布好消息，成功同中場靈魂人物久保建英續約至2029年，佢可獲得隊內頂薪，毀約金增加至6,000萬歐元(約5億港元)，令有意收購呢位22歲日本國腳嘅曼聯等豪門死心。

久保建英效力皇馬期間不斷被外借，2022年夏天正式永久轉投皇家蘇斯達，成為球隊主力，包括今季西甲上陣19場入6球及3次助攻，因而獲曼聯、拜仁慕尼黑等多間大球會垂青，所以會方急不及待同佢續約。

久保建英續約之後話：「可以同皇家蘇斯達咁偉大嘅球會續約，實在非常高興，我選擇續約有好多原因，最重要係隊友、教練、工作人員及球迷都令我有賓至如歸嘅感覺，我得到球隊上下嘅認可，想同球隊一齊成長。」

久保建英更加豪言，將會製造一單大新聞，就係協助皇家蘇斯達喺歐聯擊敗巴黎聖日耳門，將勝利送畀球迷。