連格分享南韓生活　最愛韓國燒烤

連格上年夏天被諾定咸森林放棄之後，上周終於有班落，加盟韓職球隊FC首爾，雖然呢位31歲前曼聯中場離鄉背井，但佢仍然非常享受新生活，仲喺社交網大肆分享生活點滴，包括入鄉隨俗，食韓國燒烤。

從連格嘅社交網帳戶Instagram可以見到佢上載多張近照，包括身穿FC首爾球衣，現身球場笑逐顏開，佢仲同隊友一齊去食韓國燒烤，亦向球迷介紹自己嘅住宿，似足旅遊達人。不過，唔少網民趁機抽水，勸佢唔好再沉迷吃喝玩樂，應該專心踢波，拯救足球事業。

據悉連格同FC首爾簽約2年，獲得91萬鎊年薪(約900萬港元)，雖然遠低於效力英超球會嘅人工，但已經係韓職最高薪球員。FC首爾會方亦形容連格係韓職史上「最轟動」新兵，令呢位前英格蘭國腳由「蘿底橙」躍身為一個聯賽嘅巨星。預料連格將於3月2日新一季韓職首次為FC首爾上陣，作客FC光州。