南韓足總下周決定奇連士文前途　因一事難炒佢

南韓喺今屆亞洲盃4強不敵約旦出局，再次同錦標無緣，領隊奇連士文戰術部署備受質疑，根據該國傳媒報道，南韓足總即將開會評估換帥可能性，最遲下星期有決定。

南韓爭標失敗之後，輿論認為奇連士文好大機會下台，南韓足總將會諮詢意見，睇下是否繼續畀呢位59歲德國名宿執教。據悉南韓足總最大考慮因素係金錢問題，因為奇連士文仲有近2年半合約在身，如果現時解僱佢，需要賠償70億韓元(約4,100萬港元)，相當於南韓足總今年3.7%財政預算，如果加上更換教練團成員，賠償金就更加大，令到南韓足總唔敢輕舉妄動。

奇連士文早前已經強調唔會主動辭職，似乎博炒攞賠償金，南韓將於下月世界盃外圍賽同泰國2次交鋒，若然現時換帥可能會影響備戰工作。