阿迪達助手被挖角　將成英冠最年輕領隊？

阿仙奴近年重現勁旅本色，阿迪達嘅改革成效顯著，佢嘅教練團隊亦大獲好評，其中29歲嘅西班牙教練古斯達，就被譽為歐洲最佳年輕教練之一。據英國《每日郵報》報道，諾域治已展開挖角行季，成事嘅話古斯達將成英冠史上最年輕領隊。

古斯達係阿迪達團隊嘅重要人物，由於佢同球員年齡相若，負責同球員打成一片兼做心理輔導，曾經喺馬體會同祖雲達斯青年軍執教嘅佢，亦有豐富戰術知識，被視為最有前途年輕教練之一，自然受到其他球會挖角。

諾域治總監基納柏上年11月由阿仙奴過檔，據報佢正極力邀請古斯達下季加盟，古斯達對「單飛」教波亦持開放態度。卡達維喺2015年以32歲之齡執教韋根，係英冠史上最年輕領隊，如果古斯達執教諾域治，將打破呢項紀錄。