無悔離開曼城　高爾彭馬搶歐國盃位置

車路士周日(18日)凌晨英超作客曼城，將會係小將高爾彭馬去年轉會後，首次重返曼城球場倒戈。雖然車路士今季成績低迷，但呢位21歲充新星表示無悔離隊，亦對自己喺車路士嘅爆發感到意外，希望搶到夏天歐國盃決賽周席位。

高爾彭馬季前以4,250萬鎊(約4.25億港元)由曼城轉會車路士，雖然車仔成績差勁，但佢個人表現就相當搶鏡，今季英超已有10個入波同6次助攻。高爾彭馬表示：「我對自己融入得咁快都覺得震驚，但我一直深信自己會成功。倒戈曼城感覺好古怪，首循環我已經試過倒戈，但今次返埋曼城主場感覺更加奇怪，我好期待呢場比賽到臨。」

高爾彭馬喺車路士成為必然正選，上年11月更入選英格蘭國家隊，有望出戰夏天嘅歐國盃，不過佢嘅位置競爭激烈，布卡約沙卡、菲爾科頓、拉舒福特、基亞利殊、占士麥迪臣同查洛保雲都係星級球員，高爾彭馬需要繼續保持高水平表現。