利物浦定拜仁？沙比阿朗素2揀1

高普宣布離開利物浦後，外間分析沙比阿朗素係接任頂頭大熱，不過近期拜仁慕尼黑經歷聯賽歐聯2連敗後，令事情出現變數，杜曹好大機會被炒，而沙比阿朗素同樣係接任人選，2揀1之下，沙比仔會點揀？

《每日郵報》報道，沙比阿朗素正在規劃自己嘅教練生涯，利物浦同拜仁都係佢感興趣嘅球隊，而且佢同利華古遜合約設有「離隊條款」，列明佢3支前球隊利物浦、拜仁或皇馬如果提出斟介，利華古遜必須放人，現時利物浦同拜仁都極有機會啟動此條款。

報道指，42歲嘅沙比阿朗素原打算再執教利華古遜至少1年，然後再考慮其他出路，但執教利物浦同拜仁嘅機會提早到來，令佢不得不重新規劃未來。

對沙比仔嚟講，利物浦來季肯定換帥，係佢轉工好機會，但拜仁依家可能換帥換得仲快，一旦歐聯出局，杜曹隨時執包袱，或會立即提出斟介，令沙比仔提前思考未來。