麥巴比索價年薪4.2億　皇馬咁回應

基利安麥巴比今夏自由身離開巴黎聖日耳門，似乎已成定局，下一站將加盟皇家馬德里，不過雙方仲需要一輪討價還價，年薪幾多係重點，今次轉會，麥巴比向皇馬開價年薪5,000萬歐元(約4.2億港元)，另加100%肖像權，但遭皇馬否決。

對於麥巴比嚟講，呢個價錢已經好大讓步，因為佢喺巴黎聖日耳門年薪為7,200萬歐元(約6億港元)，「轉會專家」羅曼諾報道，麥巴比已通知PSG唔會留隊，雙方未來幾個月將會共同解決離隊最終條款。

不過皇馬方面唔希望麥巴比一人破壞球隊薪酬架構，佢嘅年薪唔可以超過祖迪比寧咸同雲尼斯奧斯祖利亞太多，上述兩人年薪約為2,000萬歐元(約1.68億港元)，《馬卡報》報道，皇馬底牌係3,000萬歐元(約2.5億港元)，另加簽字費，麥巴比想去皇馬，要繼續降低條件遷就。