尼馬自爆：美斯想我加盟國際邁亞密

國際邁亞密有望重組昔日巴塞隆拿「MSN」鋒線，巴西球星尼馬近日聲稱，阿根廷球王美斯曾經邀請佢加盟呢支美職球隊，似乎有意離開沙特阿拉伯豪門希拉爾，跟隨蘇亞雷斯一齊去國際邁亞密，同美斯合作。

尼馬表示同美斯聯絡過，對方希望同佢再次拍住上：「我同美斯有交流，佢叫我轉投國際邁亞密。」不過，呢位32歲前鋒並冇透露是否接受對方邀請。

尼馬同美斯情同兄弟，兩人曾於巴塞隆拿及巴黎聖日耳門(PSG)做過隊友，並於上年夏天一齊離開PSG，尼馬以9,000萬歐元(約7.6億港元)轉會費加盟希拉爾，但僅上陣5場，就因為上年10月代表巴西國家隊比賽期間受重傷，一直長抖，估計要等到8月先至有機會復出。

尼馬現時同希拉爾嘅合約去到2025年夏天屆滿，加上傷患問題，相信佢要等多1年半時間，先至有機會再同美斯做隊友，屆時「MSN」鋒線組合美斯、蘇亞雷斯、尼馬有望再現球壇。