盛傳重返曼聯執教　摩連奴咁回應

離開羅馬後，摩連奴處於無業狀態，近日接受里奧費迪南電視訪問，被問到重返曼聯執教嘅傳聞，「寸王」用3個單字回應，就係「not from me」(唔係我講嘅)。

傳聞話，摩連奴同身邊人透露，佢喺曼聯有「未完成嘅事」，對於呢個傳聞，摩連奴以4個單字回答：「不、不、不、不。」佢進一步解釋，當年喺曼聯無法建立一支成功球隊，係因為得唔到會方支持，

摩dad以搬新屋做比喻：「好似搬新屋咁，最先做嘅係打掃，然後買新傢俬，曼聯並未按照我意思去清除垃圾，我想喺第2季大掃除，但基於不同原因，我做唔到。」

2017/18球季曼聯落後曼城19分得第2名，摩連奴曾表示該季攞英超亞軍係佢生涯最大成就之一，佢到依家仲係咁認為：「我真係咁諗，冇人比我做得更好，如果曼城因為財務違規被褫奪冠軍，曼聯將會成為該季冠軍。」