沙卡受刺激爆發？阿仙奴2場作客派11蛋

周日(18日)凌晨英超，阿仙奴作客5比0大勝般尼，繼上輪6比0狂數韋斯咸後，連續2場聯賽作客大勝並派11隻蛋。英格蘭右翼布卡約沙卡今場又有2個入波，近3仗錄得5入球同1次助攻，係2024年歐洲5大聯賽最弗球員。

阿仙奴近期火力全開，馬田奧迪加特開波4分鐘遠射得手，完半場前李安度度沙特博到12碼，沙卡操刀射成2比0，呢位英格蘭翼鋒47分鐘近門狂轟再入多球，加上李安度度沙特同夏維斯亦分別建功，協助阿仙奴大勝5比0。

近日傳出阿仙奴想簽基利安麥巴比，亦有傳媒比較話菲爾科頓更勝沙卡，令人懷疑種種傳聞刺激沙卡爆發，阿迪達賽後回應：「我唔知道，呢條問題應該問沙卡。不過我認為佢唔需要受咩刺激，佢呢個年紀(22歲)嘅前鋒、翼鋒有咁穩定嘅數據，喺球壇上非常罕有，當你見到佢每日練習同自律，就唔會覺得奇怪，佢仲可以有更多進步。」