C朗龍咁威　又創造一項神級紀錄

周日(18日)凌晨沙特阿拉伯聯賽，巨星C朗踏入龍年後，連續2場入波，率領艾納斯主場以2比1擊敗艾法特。唔計12碼，C朗職業生涯各項賽事入715球，以1球優勢力壓宿敵美斯，成為史上「非12碼」最多入波球員。

艾納斯上仗亞冠盃16強首回合贏艾費哈，C朗第1000場球會賽事射入全場唯一入球，成為主角，來到今仗第1001場繼續數胡，呢位39歲葡萄牙國腳上半場17分鐘入波打開紀錄。

雖然艾法特之後一度扳平1比1，但換邊之後，C朗又發揮王牌作用，作出一下美妙斜傳畀右路隊友艾加蘭，後者第一時間傳中，由奧達維奧艾美臣飛頂入網。

C朗原本有機會梅開二度，佢喺禁區內冷靜扣過對手起腳，但被艾法特球員護空門解圍，但無阻艾納斯全取3分。

賽後C朗喺社交網話：「又贏1場，又入1球，我哋要繼續保持。」艾納斯贏波之後，僅落後榜首希拉爾4分，但踢多對方1場。