車路士拍板　今夏11億收購域陀奧森漢

拿玻里前鋒域陀奧森漢近年成為各大球會爭奪目標，根據英國《太陽報》爆料，車路士已經同意今夏用1.3億歐元(約11億港元)直接買斷呢位25歲尼日利亞國腳嘅合約。

雖然域陀奧森漢剛於上年12月同拿玻里續約至2026年夏天，但同時將毀約金限定於1.3億歐元，任何球會出到呢個價錢，拿玻里就必須放人。由於毀約金比拿玻里上年要求嘅1.8億歐元轉會費低，引起車路士、巴黎聖日耳門關注。

據悉車仔先下手為強，即將同拿玻里方面展開會談，主要傾付款方式。域陀奧森漢上季為拿玻里各項賽事上陣39場入31球，成為球隊奪得意甲冠軍嘅功臣。不過，呢位前鋒今季受傷患問題困擾，僅上陣18場入8球。