皇馬失分2主力停賽　安帥否認受麥巴比影響

西甲冠軍爭逐再度緊湊，皇家馬德里上場大勝基羅納後成功帶出，點知周一(19日)凌晨作客華歷簡奴，意外踢成1比1痛失2分，而且有2大主力要喺下輪停賽，失分兼折將。皇馬教練安察洛堤否認球員受基利安麥巴比轉會傳聞影響。

皇馬今場3分鐘就由祖斯奴先拔頭籌，但卡馬雲加27分鐘禁區內手球輸12碼，華歷簡奴由魯爾杜馬斯操刀追成平手。皇馬之後反攻入唔到波，仲有卡馬雲加拎到今季第5面黃牌，下輪自動停賽，補時階段丹尼爾卡華積亦都2黃1紅被逐，下周對西維爾嘅賽賽同卡馬雲加齊齊坐波監。

近日盛傳法國前鋒麥巴比接近下季加盟，被問到傳聞係咪影響球員作戰，教練安察洛堤就否認：「我哋幾時試過唔集中比賽？我哋一直好專注，今日都係，我明白你哋今季真係好難搵到嘢攻擊皇馬。我對戰果當然唔滿意，但作客華歷簡奴一向困難，呢1分最後可以係寶貴嘅1分。」