曼聯拒付巨額「贖金」　新總監等2年先嚟？

曼聯高層大改組，新總監人選已鎖定係紐卡素嘅艾舒禾夫，呢位星級總監周日(18日)正式向紐卡素提出離隊要求，「喜鵲」亦即時勒令佢進入俗稱「過冷河」嘅避嫌期。不過事情冇咁簡單，因為呢段避嫌期長達2年，曼聯目前唔肯支付紐卡素要求嘅2,000萬鎊(約2億港元)「贖身費」，令呢次任命隨時要等到2026年！

據《The Athletic》報道，艾舒禾夫周日正式提出離隊要求，紐卡素即安排佢停職進入避嫌期，並即時停止佢接觸球會機密資訊嘅權限，合約規定佢喺2026年之前都唔能夠加盟另一間球會，要縮短「過冷河」時間嘅方法，就係兩間球會商討賠償方案。

報道指紐卡素要求2,000萬鎊「贖身費」，但曼聯唔想支付巨額費用，認為艾舒禾夫係「長遠計劃」。由於艾舒禾夫喺避嫌期仍會得到紐卡素全額薪水，兩間球會今個星期會再作進一步商討，睇下搵唔搵到雙贏嘅方案。