施蒙尼神作　洛蘭迪成秘密武器

馬德里體育會歐聯16強大戰國際米蘭前，主力前鋒艾華路莫拉達膝傷缺陣，不過教練施蒙尼就有神來之筆，上場聯賽畀基沙文休息下，將中場通天佬官馬高斯洛蘭迪推上箭頭，結果馬高斯洛蘭迪即入2球回應，隨時成為歐聯秘密武器！

馬體會上場西甲對拉斯彭馬斯，踢開右中場同右翼衞嘅馬高斯洛蘭迪，突然被安排做箭頭，佢亦不負所託入2球兼當選賽事MVP。呢個調動曝光後，曾引起馬體會名宿彭迪歷質疑，結果證明施蒙尼決定正確，呢位阿根廷教頭寸爆回應：「名宿係乜水？受到球迷愛戴嘅阿拉干利斯嗰啲，先至叫做馬體會名宿。」

喺歐聯會唔會再出任前鋒？馬高斯洛蘭迪表示：「教練會決定點樣踢最好，只要幫助到球隊，任何位置都冇問題。作客國際米蘭肯定好難踢，但我哋仲有時間準備，要以最佳狀態出戰。」