利物浦大鑊　2位猛將因傷無緣英聯盃決賽

利物浦上場英超擊敗賓福特，前鋒迪亞高祖達、中場居迪斯鍾斯受傷退下火線，根據英國《每日郵報》報道，呢2位主將都無法出戰2月25日晚英聯盃決賽對車路士，迪亞高祖達更加面臨長抖2個月。

迪亞高祖達當時踢到44分鐘受傷，需要用擔架抬離場，經過檢查之後，發現呢位27歲葡萄牙國腳嘅膝部傷勢唔輕，預料可能會缺陣2個月。迪亞高祖達近7次上陣入5球，並當選1月英超最佳球員，一旦佢長抖，勢必削弱紅軍攻力。至於居迪斯鍾斯足踝受傷，亦需要休息一段日子。

利物浦現時傷兵滿營，除咗迪亞高祖達、中場居迪斯鍾斯之外，右後衞阿歷山大阿諾特亦因為膝傷，無緣英聯盃決賽，加上門將艾利臣比加、中場蘇保斯拉爾有傷在身，上陣成疑，紅軍殘陣之下，要奪取英聯盃冠軍，甚為困難。