夏維斯新角色翻生　重返歐聯捧盃福地

德國國腳夏維斯季前加盟阿仙奴，經過半季後表現漸入佳境，近期獲阿迪達安排新角色後全面翻生，成為「兵工廠」爭霸重要棋子。阿仙奴喺歐聯16強首回合作客波圖，呢個球場就係3年前夏維斯喺歐聯決賽一箭定江山嘅「福地」，今次重遊舊地誓再爭取好成績。

2021年歐聯決賽喺波圖主場上演，夏維斯射入全場唯一入球幫車路士擊敗曼城捧盃，夏維斯表示：「呢段係我最美好嘅回憶，一世都唔會忘記，期待再喺呢個球場比賽，希望阿仙奴都會有我3年前一樣嘅結果。」

夏維斯近年演出備受批評，不過轉會阿仙奴後穩步上揚，近日出任左中場同前鋒切換角式，球場上自由度大增令佢發揮極佳，夏維斯回應：「我踢邊個位置都冇問題，但我唔係一個固定位置嘅球員，愈有流動性同變化就愈適合我嘅長傳，依家呢個位置好適合我，總之落到場我就會盡全力幫球隊爭勝。」