華拉尼接班人係佢　曼聯想收購祖記中堅

曼聯中堅華拉尼好可能今夏離隊，加上利辛度馬天尼斯經常受傷，根據意大利《米蘭體育報》爆料，紅魔鬼計劃今夏收購祖雲達斯中堅基爾臣比爾馬，提升防線實力。

據悉曼聯主帥坦哈格對於隊內中堅人腳唔多滿意，因為華拉尼、利辛度馬天尼斯都係「玻璃腳」，前者更準備離隊，至於莊尼伊雲斯已經36歲，加上域陀連迪路夫表現一般，得番今季回勇嘅哈利馬古尼比較可靠，有需要簽入中堅，曼聯願意以6,000萬歐元(約5億港元)收購基爾臣比爾馬。

身高1米88嘅基爾臣比爾馬6年前由巴甲球隊明尼路加盟拖連奴，2年前轉投祖雲達斯，當時轉會費達4,100萬歐元(約3.5億港元)。呢位26歲巴西國腳防守穩陣之餘，亦具備不俗助攻力，上季意甲上陣30場入4球，今季踢23場聯賽亦已有2球進帳。基爾臣比爾馬仲有4年合約在身，祖記可以吊高來賣。