國米1比0贏馬體會　歐洲最強防守

周三(21日)凌晨歐聯16強首回合，意甲勁旅國際米蘭強勢持續，主場1比0擊敗西甲嘅馬德里體育會。施蒙尼帶領嘅馬體會曾經係歐洲最強防守，但依家就被施蒙尼恩沙基嘅國米取代，國米近14場歐聯9次「零封」對手，今仗更令馬體會連1次中龍攻門都冇，贏得極具說服力。

國米憑主場氣勢踢得主動，大部份時間圍攻馬體會，但拿達路馬天尼斯多次埋門都入唔到波。踢到79分鐘，馬體會後防犯錯，拿達路馬天尼斯單刀射門被奧比歷擋出，但阿拿奧杜域趕到補射入網，為國際米蘭拎到1比0勝利。

國米嘅銅牆鐵壁發揮出色，18年來首次喺歐聯令對手全場0次中龍攻門，而且近14場歐聯僅輸1場，當中9場0失球，堪稱歐洲最強防守。施蒙尼恩沙基賽後表示：「我對表現好滿意，遺憾只係贏1球，次回合會好困難。我唔知呢隊係咪最強嘅國米，但我都好想喺呢支國米入面踢波，未來2個月會係關鍵。」