勞基梳爾面臨提早收咧　或無緣歐國盃

曼聯左後衞勞基梳爾上場英超對盧頓傷出之後，傷勢情況比預期惡劣，根據英國《每日郵報》爆料，呢位28歲英格蘭國腳面臨長抖3個月，唔止好大機會缺陣紅魔鬼今季餘下賽事，甚至無緣6月中展開嘅歐國盃決賽周。

勞基梳爾曾於季初受傷休息3個月，佢早前英超對阿士東維拉，踢完上半場退下火線，當時領隊坦哈格解釋係「預防性」，但上仗對盧頓，勞基梳爾踢到上半場補時階段又傷出，今次問題嚴重好多。

曼聯官方發表聲明，指勞基梳爾因為肌肉受傷，預料將會缺陣數個月，《每日郵報》認為佢起碼抖3個月，無法為曼聯出戰今季餘下賽事，最壞情況甚至會缺席歐國盃。

勞基梳爾長抖，加上杜維爾馬拉西亞仍在養傷，曼聯現時冇正宗左閘可用，坦哈格可能根據之前做法，用中堅域陀連迪路夫或者防守中場蘇夫恩岩拉伯特客串呢個位置，難免唔夠穩陣。

英格蘭主帥修夫基同樣頭痛，因為勞基梳爾係國家隊正選左閘，佢喺上屆歐國盃表現出色，包括決賽射入1球，若然無緣今屆賽事，勢必削弱「三獅兵團」爭標本錢。