堤亞高施華力爭復出　誓破二奶宿命

今屆英聯盃決賽將於周日(25日)晚上喺倫敦溫布萊球場舉行，利物浦對車路士，根據英國《每日電訊報》報道，有傷在身嘅車路士中堅堤亞高施華，正在加緊康復工作，希望趕及上陣。呢位39歲巴西老將之前3次為車仔喺溫布萊球場踢決賽，都同冠軍無緣，唔知今次能否打破宿命呢？

堤亞高施華受到腹股溝傷患困擾，缺陣上場英超對曼城，至於能否出戰英聯盃決賽，亦成為疑問，呢位中堅之前3次為車路士喺溫布萊球場踢決賽，包括2次英足盃及1次英聯盃，都失落錦標，加上佢將於今夏約滿，未必可以續約，當然希望臨走前打破宿命喺溫布萊球場捧盃。

不過，堤亞高施華想一圓冠軍夢，並唔容易，因為車路士自從2018年奪得英足盃冠軍之後，近6次喺溫布萊球場比賽都輸波，似乎中咗「二奶魔咒」。