丹尼爾面臨破產　尼馬接濟代畀賠償

巴西球星丹尼爾日前強姦案罪成，被判入獄4年零6個月，據西班牙傳媒爆料，呢位巴塞隆拿名將依家銀行帳戶已經變成負數，消息指多年隊友尼馬已出手接濟，甚至代丹尼爾支付畀受害人嘅賠償。

西班牙《世界體育報》報道，丹尼爾喺球員時代效力巴塞隆拿、祖雲達斯、巴黎聖日耳門等豪門，身家曾高達550萬歐元(約4,600萬港元)，但依家入獄後，銀行帳戶變成負債2萬歐元，隨時面臨破產。

法院判丹尼爾入獄之外，同時向受害人賠償15萬歐元，巴西媒體《UOL》透露，尼馬家人將出手代丹尼爾支付費用，而今次為丹尼爾做辯護嘅律師，亦係由尼馬爸爸「外借」。尼馬同丹尼爾喺國家隊、巴塞隆拿同巴黎聖日耳門都做隊友，關係密切，據報丹尼爾律師將會就判決提出上訴。