教拜仁定紅軍？沙比阿朗素親自回應

今個夏天領隊大執位，依家教利華古遜踢到識飛嘅沙比阿朗素，自然成為搶手貨。利物浦同拜仁慕尼黑都事先宣布夏天易帥，而且不約而同視前球員沙比阿朗素為頭號獵物，呢位西班牙少帥周四(22日)被問到傳聞，佢就唔肯露口風，同時亦冇否認夏天離隊可能性。

沙比阿朗素喺記者會表示：「拜仁、利物浦？我冇嘢好講，或者你哋(記者)對我嘅去向有疑問，但我依家肯定係利華古遜教練，關於未來我冇新消息，即管睇下點。有冇收到拜仁斟介？呢個只係你哋假設，我真係冇嘢可以講。」

對於傳聞有冇造成影響，沙比阿朗素就話：「我冇問題，我好清楚目標係為球隊帶嚟成功，依家球隊處於好好嘅位置，我哋要繼續保持。出現傳聞在所難免，但唔關我事。」沙比阿朗素同利華古遜合約去到2026年，但傳聞合約中有離隊條款，若利物浦、拜仁慕尼黑同皇家馬德里3支佢曾效力嘅球會斟介，利華古遜必定要放人。