冇沙拿同紐尼斯！利物浦英聯盃決賽殘陣鬥車路士
2024年02月25日 16:01
東網電視
更多新聞短片
英聯盃決賽，車路士對利物浦。
英聯盃決賽於周日（25日）晚快將開波，由車路士硬撼利物浦。利物浦剛公布正選陣容，雖然有後衞伊巴希馬干拿迪復出，但兩大射手穆罕默德沙拿同達雲紐尼斯不但未獲擔正，連後備都冇份，似乎傷情頗嚴重，車仔則有史達寧、高爾彭馬等主力打正選，唔知有冇機會偷雞呢？
車路士正選陣容
28柏度域
27馬路古斯圖 2阿素迪沙斯 26利維高維爾 21芝維爾
25摩西斯卡些度 8安素費南迪斯
20高爾彭馬 23干拿加歷查 7史達寧
15尼高拉斯積遜
利物浦正選陣容
62基利靴
84干拿巴特利 5伊巴希馬干拿迪 4華基爾雲迪積克 26安德魯羅拔臣
10阿歷斯麥亞里士打 3遠藤航 38賴恩雲格貝治
19哈維艾利洛 18加普 7路易斯迪亞斯
更多賠率
英聯盃決賽周日(25日)晚喺溫布萊爆發，由車路士同利物浦爭霸。兩隊近8次交手法定時間7次打和，包括前季英聯盃及英足盃兩場決賽踢成0比0，「紅軍」兩次都射贏12碼捧盃，心理上佔優，不過「藍戰士」士氣唔曳，決賽場合例必小心謹慎，再追和局。(HOY TV 77台周日晚11時直播)
英超榜首利物浦月初聯賽曾以4比1大炒車路士，係兩隊近8次交手首次分出勝負，之前7次碰頭都喺90分鐘打和。論牌面「紅軍」無疑秤高啲，但佢哋早前擊敗賓福特後，再有迪亞高祖達及居迪斯鍾斯受傷，連同蘇保斯拉爾、阿歷山大阿諾特同門將艾利臣比加等原有傷兵，人腳變得緊絀，球員發揮難免有顧忌。
車仔爭入聯賽前4機會渺茫，目標自然放喺英聯盃同英足盃身上，早前英足盃透過重賽淘汰阿士東維拉，可見班球員踢盃賽搏晒命。車仔今季演出飄忽，對住強隊往往有驚喜演出，上場聯賽1比1賽和曼城，士氣有所提升，再遇「老對手」利物浦有權頂住唔輸，預計可能又要鬥到加時，甚至射埋12碼分勝負都唔奇。