加普重拾射門鞋　爭做英聯盃神射手

利物浦前鋒加普近期重拾射門鞋，近2次上陣都有入波，呢位荷蘭國腳今屆英聯盃已有4球進帳，僅少過米杜士堡前鋒摩根羅渣士1球，加普今仗決賽對車路士，只要起孖，就可以獨得神射手殊榮。

加普早前曾經陷入6場入球荒，等到利物浦大勝賓福特4比1一役，先至再次取得入波，佢上仗對盧頓，又建一功，今季各項賽事上陣35場入11球，包括英聯盃上陣5場入4球，可見佢踢呢項賽事，表現特別醒神，可能成為利物浦能否勝出今場決賽嘅關鍵人物。