雲迪積克3奪決賽MVP　超霸氣反擊質疑

利物浦憑華基爾雲迪積克(VVD)一箭定江山，歷史性第10次贏得英聯盃冠軍，VVD賽後亦當選決賽最佳球員。今次係呢位荷蘭國腳歷來第3次喺決賽當選MVP，亦係首次以隊長身份帶領利物浦捧盃，難怪完場後專登拍片，霸氣反擊外界質疑！

現年32歲嘅VVD一直被譽為「世一」中堅，但近2季演出開始受到質疑，今場決賽佢交出完美數據，3次攔截、7次爭奪成功、101次成功傳送同超過9成成功率，就連進攻都有2次關鍵傳球同最重要嘅1個入波，繼2019年歐聯決賽、2022年英聯盃決賽後，第3次喺決賽當選最佳球員。

VVD賽後喺更衣室慶祝，不忘拍片反擊質疑，佢對住鏡頭霸氣表示：「佢哋覺得我已經玩完喎！」VVD喺賽後受訪就話：「兩隊都有好多入球機會，結果實在太神奇，今次係我做隊長後第1個冠軍，要好好享受一下！」